၂၀၁၉၊ ၈၊ ၁၅။ မင်းဘူးမြို့။
လူ့ဘောင်သစ်ဒီမိုကရက်တစ်ပါတီ ဋ္ဌာနချုပ်ခေါင်းဆောင်များသည် မင်းဘူးမြို့နယ် ပါတီဝင်များ၊ ပါတီလိုလားသူများ၊ လုပ်ဖော်ကိုင်ဘက် အရပ်ဖက်အဖွဲ့အစည်းများနှင့် တွေ့ဆုံပွဲကို မင်းဘူးမြို့၊ သမဂ္ဂကာရီ တောရကျောင်းတိုက်တွင် ၁၅၊၈၊၂၀၁၉ ရက်နေ့နံနက်က ပြုလုပ်ခဲ့ကြပါသည်။
တွေ့ဆုံပွဲတွင် ပါတီဗဟိုကော်မတီဝင် ဦးအောင်နိုင်ဦးက အခမ်းအနားမှူးအဖြစ် ဆောင်ရွက်ပေးပြီး အပြန်အလှန်မိတ်ဆက်ခြင်းဖြင့် စတင်ခဲ့ကြပါသည်။ ထို့နောက် ပါတီဗဟိုအလုပ်အမှုဆောင်ကော်မတီဝင် ဦးငွေလင်းက ပါတီဖြတ်သန်းမှုသမိုင်းနှင့် ပါတီ၏နိုင်ငံရေးဦးတည်ချက် ၅ ရပ်ကို မိတ်ဆက်တင်ပြပေးသည်။ ပါတီဥက္ကဋ္ဌ ဦးအောင်မိုးဇော်က ပါတီ၏အလေးထားမှု ၃ ရပ်၊ ပါတီ၏ လတ်တလောလုပ်ငန်းစဉ်များ၊ ပါတီ၏ ခေါင်းဆောင်မှုအဆင့်ဆင့်တွင် လူငယ်များနှင့် အမျိုးသမီးများ၏ ပါဝင်မှု ပိုမိုမြှင့်တင်နိုင်ရေးကြိုးပမ်းဆောင်ရွက်နေမှု စသည့်ကိစ္စများကို ဆွေးနွေးပေးပါသည်။ ထို့အပြင် ယနေ့ကာလ နိုင်ငံရေးတာဝန်များနှင့် ပါတီ၏ ဆောင်ရွက်နေမှုများကို ဆက်လက်တင်ပြပါသည်။
တက်ရောက်လာသူများကလည်း ပါတီတည်ဆောက်ရေးတွင် အလေးထားသင့်သည်များကို အကြံပြုဆွေးနွေးကြပြီး မကွေးတိုင်းအတွင်း မိမိတို့ပါတီ ကျယ်ပြန့်စွာဆောင်ရွက်လာနိုင်ရေးအတွက် ဝိုင်းဝန်း ကူညီ သွားကြမည်ဖြစ်ကြောင်း ကတိပြုဆွေးနွေးပေးကြပါသည်။
ဆွေးနွေးပွဲအပြီးတွင် မင်းဘူးမြို့နယ်ပါတီကော်မတီကို ဖွဲ့စည်းလိုက်ကြပြီး ပါတီဥက္ကဋ္ဌက မင်းဘူးမြို့နယ်ပါတီကော်မတီအား ပါတီအလံနှင့်ပါတီစည်းရုံးရေးတာဝန်များကို လွှဲအပ်ပေးခဲ့ပါသည်။
