၂၀၁၉၊ စက်တင်ဘာ၊ ၂၉။ ရန်ကုန်။
ဒဂုံမြို့သစ်၊ ဆိပ်ကမ်းမြို့နယ်၊ စက်မှုဇုံ (၁)ရှိ MCE Rainbow ဆပ်ပြာစက်ရုံ သပိတ်စခန်းတွင် ၂၉၊ ၉၊၂၀၁၉ ရက်နေ့ နံနက် ၁၀းဝ၀ နာရီ၌ စာနယ်ဇင်းရှင်းလင်းပွဲ ပြုလုပ်ခဲ့ပါသည်။
သတင်းစာရှင်းလင်းပွဲတွင် MCE အလုပ်သမားသမဂ္ဂဥက္ကဋ္ဌ မအိဇင်ဖြိုးက သပိတ်ကို ၂၂၊ ၈၊၂၀၁၉ ရက်နေ့မှ စတင်ခဲ့ပြီး တောင်းဆိုချက် (၁၃) ရပ် တောင်းဆိုခဲ့ကြောင်း၊ ခုံသမာဓိကောင်စီ၏ ကြားဝင်ညှိနှိုင်းဆောင်ရွက်ပေးမှုဖြင့် သဘောတူညီချက်များရရှိခဲ့ပြီး မိမိတို့သပိတ်မှောက်ရဲဘော်များက လက်ခံသော်လည်း အလုပ်ရှင်ဘက်မှ တစုံတရာ ဆက်သွယ်လာမှု မရှိသေးကြောင်း ထို့ကြောင့် မိမိတို့အနေဖြင့် သပိတ်စခန်းပိတ်သိမ်းရန်နှင့် အလုပ်ပြန်လည်ဝင်ရောက်ရန် ခက်ခဲလျက်ရှိကြောင်း ပြောကြားခဲ့ပါသည်။ စက်ရုံတွင် အလုပ်သမားပေါင်း ၃၀၁ ယောက် ရှိရာ သပိတ်တွင် အလုပ်သမား ၉၀ ပါဝင်လျက်ရှိသည်ဟု သိရပါသည်။
ရှင်းလင်းပွဲသို့ ပါတီ၏ အလုပ်သမားရေးရာကော်မတီမှ ဒေါ်နှင်းနှင်းမွှေးနှင့် လူ့ဘောင်သစ်လူငယ်များ တက်ရောက်ခဲ့ပြီး သက်ဆိုင်ရာတာဝန်ရှိသူများထံ ဆက်သွယ်ကူညီဆောင်ရွက်ပေးခဲ့ပါသည်။ အလှူငွေလည်း ပေးအပ်ခဲ့ပါသည်။
နေ့လည်ပိုင်းတွင် အလုပ်ရှင်ကိုယ်စားလှယ်များ လာရောက်၍ ခုံသမာဓိဆုံးဖြတ်ချက်များကို လက်ခံကြောင်း လာရောက်ပြောဆိုခဲ့ပြီး အောက်တိုဘာ ၁ ရက် နေ့လည်ပိုင်းတွင် နှစ်ဖက်သဘောတူစာချုပ် ချုပ်ဆိုခဲ့ကြပါသည်။
