၄၆ နှစ်မြောက် ကိုကိုးကျွန်း ပြည်သူ့ သူရဲကောင်းနေ့ အခမ်းအနားကို ၃၁-၇-၂၀၁၇ နံနက်ပိုင်းက တောင်ဥက္ကလာပ စိတ်တိုင်းကျခန်းမတွင် ကျင်းပခဲ့ပါသည်။ အခမ်းအနားမှူးအဖြစ် ကျွန်းပြန်ရဲဘော်ကြီး ဦးကျော်စိုးက ဆောင်ရွက်ခဲ့ပြီး ကိုကိုးကျွန်းပြန်ရဲဘော်များကိုယ်စား ကျွန်းပြန်ရဲဘော်ကြီး ဦးလှချိုက အဖွင့်အမှတ်တရစကား ပြောကြားခဲ့ပါသည်။ ညီညွတ်သောတိုင်းရင်းသားလူမျိုးများမဟာမိတ်အဖွဲ့မှ ဦးစိုင်းညွန့်လွင် ၇၄-၇၅-၇၆ နိုင်ငံရေးအင်အားစုမှ ဦးစံနု ဦးကျော်အောင် လူ့ဘောင်သစ် ဒီမိုကရက်တစ်ပါတီမှ ဒေါ်နှင်းနှင်းမွှေးတို့က အမှတ်တရ ဂုဏ်ပြုစကား ပြောကြားကြပြီး သဝဏ်လွှာများ ဖတ်ကြားခဲ့ကြပါသည်။ ကိုကိုးကျွန်းပြန်နိုင်ငံရေးရဲဘော်များ၏ သဘောထားကြေညာချက်တစောင်ကိုလည်း ထုတ်ပြန်ခဲ့ပါသည်။
