“နှစ် ၇၀ စာ ငြိမ်းချမ်းရေးဆောင်းအိပ်မက်များ” ငြိမ်းချမ်းရေးအပေါ် လူငယ့်အမြင်များဆွေးနွေးပွဲနှင့် ဂီတဖျော်ဖြေပွဲ

အပြည်ပြည်ဆိုင်ရာ ငြိမ်းချမ်းရေးနေ့အထိမ်းအမှတ်အဖြစ် လူ့ဘောင်သစ်လူငယ်က စီစဉ်ကျင်းပသည့် “နှစ် ၇၀ စာ ငြိမ်းချမ်းရေးဆောင်းအိပ်မက်များ” ခေါင်းစဉ်ဖြင့် ငြိမ်းချမ်းရေးအပေါ် လူငယ့်အမြင်များဆွေးနွေးပွဲနှင့် ဂီတဖျော်ဖြေပွဲကို ၂၀၁၈၊ စက်တင်ဘာလ ၂၁ ရက်နေ့က ရန်ကုန်မြို့ Pansodan Scene တွင် ပြုလုပ်ခဲ့ပါသည်။
ပထမပိုင်း လူငယ့်အမြင်ဆွေးနွေးပွဲတွင် လူ့ဘောင်သစ်လူငယ်အတွင်းရေးမှူး ကိုမျိုးစော့က ကြိုဆိုနှုတ်ခွန်းဆက်စကားပြောကြားပြီး လူငယ်စွမ်းရည်မြှင့်တင်ရေးသင်တန်းကျောင်းမှ ကျောင်းသူကျောင်းသားများက ”We shall Overcome” သီချင်းကို သီဆိုဖျော်ဖြေခဲ့ကြပါသည်။
ထို့နောက် ”ငြိမ်းချမ်းရေးအပေါ်လူငယ့်အမြင်” စကားဝိုင်းကို ဘီအက်စတာဇယ်နော (Kachin Youth Solidarity)၊ ကိုဇေလင်းမွန် (Yangon Youth Network)၊ Khun Brnard Bote (Karen New Generation Youth)တို့က ဦးဆောင်ဆွေးနွေးခဲ့ကြပြီး မအိသဉ္ဇာမောင်(YNS)က Moderator အဖြစ် ဆောင်ရွက်ခဲ့ပါသည်။
စကားဝိုင်းတွင် ဦးဆောင်ဆွေးနွေးသူ လူငယ်ခေါင်းဆောင်များက တိုင်းရင်းသားဒေသများရှိ စစ်ဘေးဒုက္ခသည်များ၏ အခြေအနေ၊ အစိုးရ၏ အမျိုးသားပြန်လည်သင့်မြတ်ရေးလုပ်ငန်းစဉ်အပေါ် အမြင်သဘောထား၊ ငြိမ်းချမ်းရေးလုပ်ငန်းစဉ်တွင် လူငယ်များပါဝင်မှုအခြေအနေများနှင့် မြန်မာ့တပ်မတော်၏လူသားမျိုးနွယ်စုအပေါ် ကျူးလွန်ထားသော ရာဇဝတ်မှုများအပေါ် နိုင်ငံတကာမှ ICC စွဲချက်တင်ထားမှုအပေါ် သဘောထားများကို ဆွေးနွေးခဲ့ကြပါသည်။ လူ့ဘောင်သစ်ဒီမိုကရက်တစ်ပါတီခေါင်းဆောင်များလည်း ဆွေးနွေးပွဲ တက်ရောက်ခဲ့ကြပါသည်။
ဒုတိယပိုင်း အစီအစဉ်အဖြစ် ဂီတပွဲအား ဆက်လက်ကျင်းပခဲ့ရာ Floke Rose, Brain Trust, Poebe Khun Zaw, Dominant, Zin Linn- Angry Flock, Y.ES Students တို့က အနုပညာဖြင့် ဖျော်ဖြေခဲ့ကြပါသည်။