ပညာရေးစနစ်ပြုပြင်ပြောင်းလဲရေး နိုင်ငံလုံးဆိုင်ရာကွန်ရက် (NNER)၏ ပညာရေးမူဝါဒဆိုင်ရာ အလုပ်ရုံဆွေးနွေးပွဲ ဒုတိယနေ့ကို မြိတ်မြို့၊ ပုလဲရတနာခန်းမ၌ ၂-၄-၁၇ ရက်နေ့တွင် ဆက်လက်ပြုလုပ်ခဲ့ပါသည်။ NNER လုပ်ငန်းအဖွဲ့ဝင်များ၊ လူ့ဘောင်သစ်လူငယ်၊ လူ့ဘောင်သစ်ဒီမိုကရက်တစ်ပါတီ၊ ဗကသများအဖွဲ့ချုပ်၊ ထားဝယ်ခရိုင်ကျောင်းသားများသမဂ္ဂ၊ မြိတ်ခရိုင်တက္ကသိုလ်များ ကျောင်းသားသမဂ္ဂ၊ LGBT၊ အလွတ်ပညာသင်ကျောင်းဆရာများ၊ မြန်မာနိုင်ငံ ဆရာ ဆရာမများအဖွဲ့ချုပ်၊ ၈၈ – ငြိမ်း/ပွင့်၊ တောင်သူများသမဂ္ဂ၊ ဘကကျောင်းဆရာများ၊ ပညာရေးပြုပြင်ပြောင်းလဲမှုကို စိတ်ပါဝင်စားသော ဒေသခံများနှင့် ပညာရေးဝန်ထမ်းဟောင်းများ တက်ရောက်ဆွေးနွေးခဲ့ကြပါသည်။ နံနက်ပိုင်းတွင် NNER ၏ ပညာရေးမူဝါဒများကို ဆွေးနွေးခဲ့ကြသည်။ ညနေပိုင်းတွင် တက်ရောက်လာသည့် အဖွဲ့အစည်းအသီးသီးက အပြန်အလှန် ဆွေးနွေးညှိနှိုင်းကြ၍ တနင်္သာရီတိုင်းဒေသကြီး NNER ကွန်ရက်အား ဖွဲ့စည်းခဲ့ကြပါသည်။
